Ang lokal nga pangagamhanan sa Malaybalay pinaagi sa buhatan sa Traffic Management Center pinangulohan ni TMC Head Mr. Joseph G. Jabla kauban si Traffic Operations Officer III Mr. Ernie Neri, Sr. misusi pag-usab sa sitwasyon sa kadalanan human gihatagan sa notice ug warning kadtong mga tag-iya sa mga sakyanan nga dugay na nga naka parada ug gipasagdan sa daplin sa dalan tungod sa rason nga adunay mga daut o mechanical trouble.

Kini human makita nga nahimo nang traffic hazard ang maong mga kadalanan tungod kay adunay mga babag ug naka balda sa hawan nga agianan sa mga sakyanan ug mga katawhan nga gabaklay.

Ang TMC mipadala sa mga sulat ngadto sa mga tag-iya ug human sa pito (7) ka adlaw gikan sa pagdawat sa maong notice ug ang pagka-pakyas niini sa pag comply sa nakalatid nga buluhaton, ang TMC mohimo na sa pag guyod sa maong illegally-parked nga sakyanan ngadto sa impounding area alang sa tukmang disposisyon, kini pinasubay sa Section 44, sa City Ordinance 900 series of 2019.

Kahibaloan nga ang general rule sa parking regulation mao nga gidili ang pag-gamit sa mga kadalanan nga mamahimong parking area.

Report: TMC-NADA