Ang buhatan sa Department of Social Welfare and Development (DSWD) nakig alayon sa syudad sa Malaybalay para sa pagpang apud-apud sa Social Pension para sa mga kabus nga Senior Citizens nga nag edad ug 65 anyos pataas.

Mikabat sa 3,252 nga mga kabus, masakiton, ug mga walay supporta gikan sa ilang Pamilya nga mga Senior Citizens ang naka takda nga modawat sa ilang ikaduhang semestral nga Social Pension nga nagkantidad sa Php 3,000.00.

Kini nga pagpang apud-apud gi himo sa tulo (3) ka cluster ang Poblacion Cluster naghimo sa pagpang apud-apud sa Social Pension didto gipahigayon sa Barangay Patpat, Barangay 9, Barangay San Jose, Barangay Aglayan covered court niadtong Agosto 15, 2023, samtang ang Upper Pulangi/ Can-ayan Cluster nagpahigayon niini atong Agosto 16,2023 ngadto sa Barangay Kulaman, Barangay Zamboanguita ug Barangay Can-ayan covered court. Ang Basakan Cluster naghimo sa maong pagpang apud-apud didto sa Barangay Managok ug Barangay Simaya Covered Court atong Agosto 17,2023.

Ang mga Senior Citizens nga wala naka kuha sa ilang Social Pension sa gitakda nga schedule kada cluster, mahimong mo kuha sa ilang Pension atong Agosto 18,2023 didto sa Barangay 9 Covered court.

Ang tanan nga mga Senior Citizens nga wala naka kuha sa ilang Social Pension sa gi hatag nga schedule sa Agosto 15-18,2023 gi tagaan pa usab ug panahon sa pagkuha niini niadtong Setyembre 13,2023. Kini gipahigayon sa Brgy. Casisang Covered Court. Sa kinatibuk-ang aktibidad adunay 3,252 ang naka kuha sa ilang pension nga nagkantidad tanan og P 9,756,000.00.

Kwalipikadong benepisaryo sa Social Pension nga programa para sa Indigent Senior Citizens mahatagan ug P 500.00 matag bulan diin ihatag kini matag semestral aron makatabang sa pagsupplementar sa matag adlaw nilang panginahanglan.

Report: CSWDO-NADA