Ang City Agriculture Office (CAgO) sa pakigtambayayong sa City Agriculture and Fishery Council (CAFC) nagsaulog sa ika-20 ka tuig nga Kongreso niadtong Nobyembre 16, 2022 sa Veranda, Casisang, Malaybalay City nga adunay tema nga “Revitalizing Agripreneurs Towards Agro-economic Stability”. Kini maoy tinuig nga kalihokan nga gipahigayon sa CAgO agig pasidungog ug pag-ila sa mga paningkamot ug bililhong kontribusyon sa mga mag-uuma sa dakbayan. Mao usab kini ang panahon diin lainlain nga produkto sa negosyo sa mga Malaybalay Agri-preneurs ang mapakita.
Ang Tapok Mag-uuma 2022 gisalmotan sa 106 ka mga partisipante nga gilangkuban sa BAFC Chairperson matag barangay, lima ka miyembro matag sektor, mga empleyado sa City Agriculture’s Office ug uban pang ahensya sa gobyerno nga direktang nalambigit sa pagpalambo sa agrikultura sa dakbayan sama sa Department of Science and Technology (DOST), Provincial Agriculture Office (PAO), Department of Trade and Industry (DTI), Bureau of Fisheries and Aquatic Resources (BFAR), National Food Authority (NFA), Philippine Fiber Industry Development Authority (PhilFIDA), Philippine Coconut Authority (PCA) , National Dairy Authority (NDA), Regional Agriculture and Fishery Council (RAFC) ug lain-laing buhatan sa Local Government Unit sa Malaybalay.
Atol sa programa, ang mga inilang bisita mihatag sa ilang hugot nga suporta sa mga mag-uuma. Gihangop ni CAFC Chairperson Leonard O. Leyros ang nagkadaghang miyembro ug ang pag-apil sa kababayen-an sa ilang mga kalihokan.
Si Konsehal Alan Ryann O. Legaspi mipaambit nga mihimo na sila ug ordinansa alang sa suporta sa mga tinuod nga mga Organic Farmers sa siyudad nga may kantidad usa (1) milyon ka pesos matag tuig. Samtang, gipadayag ni Konsehal Winky Damasco nga ang AFC Congress dako og tabang sa mga mag-uuma aron mapakita ang ilang produktibidad pinaagi sa tabang sa CAgO nga gipangulohan ni City Agriculturist Remedios R. Sarzuelo.
Si Congressman Jonathan Keith T. Flores nga girepresentahan ni Manuel Sicalan III, mipadangat sa mensahe nga naglatid sa priority bill sa kongresista isip Chairman sa Committee on Government Reorganization. Kini nga balaudnon usa ka mahinungdanong bahin ni Presidente Ferdinand “Bongbong” Marcos ilabina sa butang nga “right sizing” sa gobyerno aron masiguro nga ang mga kahinguhaan sa gobyerno magamit nga episyente. Ang kongresista sakop usab sa Committee on Food nga iyang ma-relate sa tema sa 20th AFC Congress. Dugang pa niya nga gusto sa kongresista nga dili lang training ang makuha sa mga mag-uuma kon dili lakip na ang mga materyales/tools nga gamiton, hinungdan nga iyang gidasig ang mga mag-uuma nga mosumiter og tuyo sa iyang buhatan. Kung ang matag mag-uuma adunay maayong relasyon sa matag lebel sa katilingban, ang gilantaw nga programa makab-ot, dugtong pa ni Sicalan.
Si Dir. Sancho A. Mabborang, OIC-Regional Director sa DOST 10 ang keynote speaker sa maong kalihukan mipadala kang PSTD Virgilio M. Fuertes isip representante niini kinsa mipadangat usab sa iyang kalipay nga adunay mga Magsasakang Siyentista nga mitambong sa maong aktibidad ingon man mihatag ug bili sa Techno Pinoy Center o ang Farmers Information and Technology Services Center nga ania sa siyudad. Gipahayag ni Dir. Mabborang ang iyang mensahe pinaagi sa usa ka video nga naghisgot sa agenda sa ekonomiya sa Presidente aron makab-ot ang supisyente nga pagkaon ug mahimong lig-on sa mga panahon sa katalagman. Iyang gipa-ambit ang mahitungod sa Community Empowerment Thru Science and Technology sa DOST aron makab-ot kini nga mga tumong. Iya usab gidayeg ang Magsasakang Siyentista ug Agri-preneurs sa syudad sa ilang mga paningkamot sa smart-farming ug value-adding.
Si Mayor Jay Warren R. Pabillaran sa iyang mensahe namulong bahin sa kamahinungdanon sa agrikultura tungod kay gipili sa uban nga naa sa lainlaing natad. Giawhag niya ang mga mag-uuma sa paggamit sa siyentipikong pamaagi sa ilang mga umahan ug mipahibalo kabahin sa taas nga proseso sa gobyerno sa dili pa ipagawas ang mga inputs. Gihagit usab niya ang mga tigpaminaw, sa pag-uma tungod kay mas dako ang kita niini ug gidasig sila sa pag-patronize sa mga lokal nga produkto. Gipasidunggan usab niya ang mga mag-uuma pinaagi sa pag-ila sa ilang pagkamalahutayon ug gipasalig nga maaprobahan ang napulog tulo ka mga resolusyon nga gipresentar kaniya ni CAFC Leyros.
Ang pagtunol sa Plaque of Appreciation ug Recognition sa Active Rural Based Organization gihatag gilayon ngadto sa lain-laing mga mag-uuma ug organisasyon matag kategorya. Ang mga awardees mao ang mosunod: Numeriano O. Quemado III alang sa Young Farmer Category; Celso P. Barberan para sa Corn Farmer Category; Antonio S. Rullan Sr. para sa Rice Farmer Category; Christine A. Albit alang sa Abaca; Deomedes Q. Acebo para sa Agroforestry Farm; Theton P. Binaliw para sa Agriculture Entrepreneur; Malaybalay City SAAD Fisherfolk Agriculture Cooperative ug Malaybalay City RIC Agri-Products Inc. para sa Farmer and Fisherfolk Organization; Malaybalay City Federation sa 4H Club para sa Young Farmer Organization; Panguma nga Haum ug Inatu nga Malahutayon Farmers Agriculture Cooperative (PHIMFACO) para sa Farmer Organization; Malaybalay City Agricultural and Fishery Council para sa Agricultural and Fishery Council, Allan A. Jumalon para sa Sugarcane Farmer og Fernie Tapay para sa Small Animal Raiser-Adopting Integrated Farming System. Gihatagan usab ug Certificate of Appointment gikan sa DA-ATI para sa lima ka tuig isip Magsasakang Siyentista sila si Wilmar Ompoc og Fernie Tapay.
Ang presentasyon sa lain-laing ahensya gipasiugdahan sa hapon sa PHILFIDA, DTI, BFAR, PCA ug City Veterinary Office diin lain-laing mga mulo ang gipadangat. Ang panagtapok sa mag-uuma maoy nagpaagi nga sila makapahayag sa ilang mga katuyoan og inisyatibo para magamit sa umaabot.
NADA-CAgriO Gecel Quinquiño-Ocon