Ang lokal nga pangagamhanan sa Malaybalay City pinaagi sa City Agriculture Office (CAgO) ug sa pakig- koordinasyon sa Department of Interior and Local Government (DILG) ug 8th Infantry Battalion miduyog niadtong Pebrero 3, 2023 sa pagpahigayon ug laing City Peace and Order Council (CPOC) Livelihood Program nga mao ang Cattle, Swine Production and Management Seminar ug Turn-Over Ceremony.
Gisalmotan sa 23 ka mga partisipante ang gipahigayon nga seminar sa buntag, didto sa Farmers Training Center diin nahimong resource persons ang mga personahe sa City veterinary office nga sila si Mr. Phile Rae M. Bonggo, Livestock Inspector II nga mihisgot kabahin sa Native Pig Production Management ug si Dr. Omar T. Cahanap, Veterinarian I, ang mipaambit og kahibalo mahitungod sa Basic Cattle Operation.
Sa pagkahapon niini, gipahigayon ang pormal nga turn-over ceremony uban sa presensya ni Mr. John Valmores, representante ni Mayor Jay Warren R. Pabillaran, Konsehal Alan Ryann O. Legaspi, Konsehal Royland M. Orquia, City Agriculturist Remedios R. Sarzuelo, Acting Assistant City Agriculturist Engr. Richard B. Leono, CAFC Chairperson Leonard O. Leyros, Datu Nonilon O. Cacay, Pigbuligaan Federation Pesident ug mga representante gikan sa 88IB, 4ID sa Philippine Army.
Atol sa programa, gipadangat ni Mr. Valmores ang mensahe nga makanunayon nagasuporta ang LGU alang sa kalinaw ug kahapsay sa dakbayan. Gidugang usab ni Ms. Danica Rose De Leon representante sa 881B nga ang gobyerno naghimo sa ilang bahin sa pagtabang sa mga rebel returnees pinaagi sa paghatag ug panginabuhian. Samtang si Datu Cacay nipadayag sa iyang pasalamat sa panginabuhian nga ilang madawat ug nanghinaot nga ang ubang miyembro mokooperar ug magpasalamat.
Si CA Sarzuelo usab namulong nga determinado ang City agriculture office nga mapa-abot ang mga serbisyo niini sa lagyong mga komunidad. Ug nga isip usa ka magsisibya giawhag ni CAFC Leyros ang ubang mga indibidwal sa maong mga grupo nga makig-uban og balik sa gobyerno.
Gipadayag usab nila ni Konsehal Legaspi ug Konsehal Orquia nga nakapasa na sila og ordinansa nga makatabang sa mga mag-uuma nga mosustiner sa ilang panginabuhian ug madasig sa pag-atiman sa proyektong madawat.
Ang pito (7) ka asosasyon nga midawat sa tag isa ka baka nga babaye mao ang Pigbuligaan Association sa Barangay Apo Macote, Linabo, Kalasungay, Mapulo ug St. Peter, Patpat Special Women Workers Asosasyon ug Panamucan Small Farmer’s Association sa Barangay San Jose. Nagkantidad ug Php 500,000 pesos alang sa pito ka baka nga nadawat ug kini gikan sa 2022 City Peace and Order Fund. Gipa-agi sa draw lots ang paghatag sa maong mga baka aron adunay patas nga pagbahin ug kini gipasiugdahan sa Agri-livestock team nga gipangulohan ni Mr. Orlando John Paulican. Gitunol usab ngadto kanila ang biologics/vitamins sa City veterinary Office.
Ang City Peace and Order Council naglaum nga ang giumol nga mga plano ug gipatuman nga mga programa magdala ug inklusibo ug malungtarong kalinaw ug matubag ang mga ugat nga hinungdan sa mga insurhensiya ug armadong panagbangi sa giila nga mga komunidad. Tinguha niini nga makuha ang kasingkasing ug hunahuna sa katawhan pinaagi sa paghatag kanila og mga programa ug serbisyo sa gobyerno.
Report: Gecel Q. Ocon, NADA-City Agri